Барселона ја бара замената за Левандовски. Во игра се две имиња

БАРСЕЛОНА ја сведе својата потрага по наследникот на Роберт Левандовски на две имиња. Полскиот напаѓач е веќе на крајот од својот договор на Камп Ноу кој истекува по завршувањето на оваа сезона и малку е веројатно дека ќе му биде понудено продолжување на соработката. Затоа, се очекува каталонскиот клуб ова лето да се насочи кон пазарот за нов центарфор.

Откако пристигна од Баерн Минхен во 2022 година, Левандовски беше исклучителен, реализирајќи 78 голови во 119 првенствени настапи. Сепак, оваа сезона се бори со повреди поради кои само на осум натпревари започнал како стартер. Иако за 812 минути игра постигна девет гола, веројатно е дека ќе го напушти клубот кога договорот ќе му истече.

Лапорта сонува за Алварез

Според информациите од ESPN, Барселона ги идентификуваше двајца напаѓачи како главни целни играчи за носење на дресот со број девет. Претседателот на клубот, Жоан Лапорта, кој во март повторно се кандидира за избор, “уште сонува” за доведување на Хулијан Алварез ова лето.

Аргентинецот е веќе долго време поврзан со преминување во актуелниот шампион, но договорот со напаѓачот на Атлетико Мадрид може да биде комплициран. Се очекува мадридскиот клуб да бара повеќе од 100 милиони евра за Алварез. Дополнително, 25-годишникот оваа сезона не е во најдобра форма, постигнувајќи само седум голови во Ла Лига. Барселона би имала конкуренција од лидерот во Премиер Лигата, Арсенал, ако Атлетико одлучи да го продаде играчот на лето.

Деко е наклонет кон Влаховиќ

Спортскиот директор Деко разгледува поекономични опции, а како главен кандидат за наследникот на Левандовски се истакнува напаѓачот на Јувентус, Душан Влаховиќ. Се очекуваше Влаховиќ да го напушти торинскиот клуб уште во јануарскиот преоден рок, но повредата во ноември го оддалечи од терените до март. Влаховиќ беше поврзуван со Барселона уште во 2022 година пред да премине од Фиорентина во Јувентус.

Договорот на 25-годишниот српски репрезентативец истекува на крајот на сезоната, што значи дека е слободен да потпише преддоговор со странски клубови. Откако пристигна во Јувентус, се мачеше да ги исполни очекувањата и оваа сезона постигна само три првенствени гола. Барселона не е единствената заинтересирана за Влаховиќ; го следат и англиските прволигаши Тотенхем и Челси, додека Милан се надева дека ќе го задржи во Италија.