Баерн во првиот полуфинален меч во ЛШ ќе биде без тренер – ова е причината!

Тренерот на Баерн, Венсан Компани, ќе го пропушти првиот натпревар од полуфиналето на Лигата на шампионите против ПСЖ поради три жолти картони што ги собра оваа сезона.

Откако доби жолти картони за време на лигашките натпревари против Арсенал (1-3) и ПСВ Ајндховен (2-1), Компани го заработи третиот картон, кој води до автоматска суспензија за еден натпревар, во среда во натпреварот против Реал Мадрид.

Белгискиот тренер „пожолте“ поради протестите до судијата Славко Винчиќ по голот на Килијан Мбапе во 42. минута со кој Реал поведе со 3-2.

Во акцијата што му претходеше на голот на Реал, Антонио Рудигер го собори Јосип Станишиќ, а хрватскиот репрезентативец по натпреварот изјави дека Рудигер го навредувал. Винчиќ не досуди прекршок за Баерн, а откако гостите дадоа гол, му покажа жолт на Компани за протестите.

Кога го прашаа за суспензијата по натпреварот, тренерот на Баерн кусо изјави: „Ова правило за суспензија е премногу строго.”