Арсенал се договори со Сака за нов договор

Букајо Сака договори продолжување на својот договор со Арсенал за уште пет години, пренесува “Атлетик”.

Сегашниот договор на англискиот репрезентативец истекува во јуни 2027 година, но според британскиот медиум, “топчиите” му понудиле нова спогодба со подобри услови, што ќе го задржи во лондонскиот фудбалски клуб до 2031 година.

24-годишниот Сака е продукт на академијата на Арсенал и за своите осум сезони со првиот тим има постигнато 77 гола во 290 натпревари. Изминатите месеци, клубот од главниот град ги продолжи договорите со неколку важни фудбалери, вклучувајќи ја парот во центарот на одбраната Вилијам Салиба и Габриел Магалаеш, како и уште двајца таленти од академијата, кои се дел од првиот тим – Итан Нуанери и Мајлс Луис-Скели.

Арсенал е лидер на табелата во Премиер лигата со 49 поени, на 6 пред Манчестер Сити и Астон Вила. Овој викенд тимот на Микел Артета гостува кај Портсмут во третото коло од ФА Купот.