Анчелоти заврши на суд – му се заканува затвор?!

Во Мадрид започна судењето на тренерот на Реал Мадрид Карло Анчелоти. Славниот Италијанец е обвинет за даночна измама.

Шпанското обвинителство го обвини можеби најдобриот фудбалски тренер на светот дека прикрил данок од над милион евра, бидејќи не ја пријавил заработката од правата на сопствената слика меѓу 2014 и 2015 година, во неговиот прв мандат на клупата на Реал.

Обвинителите го обвинија италијанскиот тренер дека во своите даночни пријави го навел само личниот надомест кој го примил од Реал во текот на тие две години, иако самиот се изјаснил дека е даночен резидент во Шпанија и навел дека му е домот во Мадрид.

Обвинителите во Мадрид бараат казна од четири години и девет месеци затвор за Анчелоти.

Сепак, тешко е да се очекува дека Анчелоти навистина ќе заврши зад решетки. Да потсетиме, Кристијано Роналдо во 2018 година призна дека извршил даночна измама во Шпанија додека играл за Реал, се работеше за цифра од дури 18,8 милиони евра, осуден е на две години затвор, но секако дека не робија туку казната беше условна, бидејќи таква е праксата во шпанскиот закон за сите казни од најмногу две години.