Алкалоид пред голем предизвик: Во квалификациите за Европската лига го доби најтешкиот противник!

Екипата на Алкалоид ќе има исклучително тежок предизвик на патот кон групната фаза од Европската лига, откако ждрепката ѝ го додели најнезгодниот можен ривал – бундеслигашот Хановер. За разлика од нив, македонскиот шампион Вардар директно се најде во групната фаза.

Судбината не беше наклонета на македонскиот претставник, бидејќи Хановер важи за еден од најсилните тимови што беа во понудата за квалификациската фаза.

Избраниците на Кире Лазаров првиот меч ќе го одиграат на домашен терен на 30 или 31 август, а реваншот ќе се игра во Германија на 6 или 7 септември.

Алкалоид во оваа фаза се најде со вајлд-карта добиена благодарение на триумфот во ЕХФ Европскиот куп – трофеј кој минатата сезона го донесе првиот значаен европски успех за клубот.