ФФМ ја прекина соработката со Ванче Шиков и Љупчо Трајковски!

Фудбалската федерација на Македонија донесе одлука за кадровски промени, откако ги раскина договорите со кавадаречките тренери Ванче Шиков и Љупчо Трајковски.

Шиков досега беше дел од стручниот штаб на А репрезентацијата, како помошник на селекторот Гоце Седлоски, додека Трајковски работеше во Спортската академија на ФФМ и беше вклучен во младинските селекции. Со најновата одлука, двајцата повеќе нема да ги извршуваат своите функции во рамки на федерацијата.

„Фудбалската федерација на Македонија информира дека Ванче Шиков повеќе не е дел од стручниот штаб на А репрезентацијата на Македонија. Селекторот Гоце Седлоски во наредниот период дополнително ќе одреди замена на неговата позиција. Му благодариме на Ванче Шиков за досегашниот ангажман и придонесот во работата со националниот тим и му посакуваме многу успех во понатамошната кариера“, се вели во соопштението на ФФМ за отказот на Ванче Шиков.

Во однос на Трајковски, од ФФМ информираа дека соработката е прекината и покрај неговиот ангажман во повеќе улоги, вклучително и во младинските категории и клупскиот фудбал.

„Фудбалската федерација на Македонија (ФФМ) ја информира јавноста дека е донесена одлука за раскинување на договорот со Љупчо Трајковски, кој во моментот ја извршува функцијата спортски директор на ФК Тиквеш, а воедно беше ангажиран како тренер во Спортската академија на ФФМ за генерација 2011 и асистент на селекторот Горан Станковски во репрезентацијата до 15 години. ФФМ изразува благодарност до Љупчо Трајковски за неговиот ангажман и придонес во работата со младите фудбалери, посакувајќи му успех во понатамошната кариера“, информираа од ФФМ за смената на Љупчо Трајковски.