Фенербахче го избрка српскиот џин Марјановиќ

Српскиот кошаркар и највисок играч во Евролигата, Бобан Марјановиќ, повеќе не е дел од Фенербахче, потврди клубот од Истанбул во понеделникот.

Поранешниот НБА кошаркар минатото лето потпиша едногодишен договор со турскиот клуб, но имаше опција да ја прекине соработката пред јануари и ја искористи.

Фенербахче пред неколку дена објави дека го продолжил договорот со Кем Бирч до крајот на сезоната и веднаш се постави прашањето за иднината на Марјановиќ, кој речиси не добива шанса од тренерот Шарунас Јасикевичијус.

Клубот од Босфорот истовремено се обидува да се засили на позицијата „пет“ каде што покрај Бирч се уште и Николо Мели и Сертан Шанли.

Триесет и шестгодишниот српски кошаркар одигра шест натпревари во Евролигата и во просек бележеше 4 поени и 3.5 скокови за 10 минути на теренот. Во турската лига има учинок од 10.1 поени (67.6% за два), 4.9 скокови, 1.6 асистенции и 0.4 блокади.