Алегри: Роналдо е програмиран да победува, Бензема е најдобар напаѓач

Трофејниот италијански тренер, Масимилиано Алегри после подолго време се огласи во медиумите.

Алегри имаше големо интервју за „Скај Италија“ во кое зборуваше за својата иднина, но и за фудбалерите кои имал шанса да ги тренира, а посебно се осврна на Роналдо.

„Роналдо е исто така човек и може да погреши, но малкумина се како него. Силата на Роналдо е во тоа што тој е програмиран да победува. Веќе освои 5 Златни топки, толку многу титули, но се уште наоѓа начин и секој ден е мотивиран се повеќе“, изјави Алегри.

Италијанскиот тренер потоа зборуваше за најдобрите напаѓачи во светот и посебно го пофали Бензема.

„Левандовски прави неверојатни нешта. Халанд е добар, но треба да работи уште многу за да стигне до тоа ниво. Ибрахимовиќ во последно време игра како класичен напаѓач, претходно играше по цел терен и правеше на другите да им биде полесно. Според мене Бензема е најдобриот, колку години е во Реал и секогаш е на врвот. Клубот може да донесе многу други напаѓачи, но тешко дека некој ќе го замени Бензема“, истакна Алегри.