Роналдо и Роберто Карлос купија фудбалски клуб

Поранешните бразилски фудбалски легенди Роберто Карлос и Роналдо, заедно со неколку други партнери, го купуваат бразилскиот клуб Интернасионал де Лимеира, кој моментално игра во третата лига. Карлос ја сподели оваа вест во емисијата “Debate em Jogo”. “Јас и Роналдо ги завршуваме постапките за купување на Интернасионал де Лимеира со Енрико и уште двајца партнери, еден од Африка и друг од Арапскиот свет”, изјави поранешниот лев бек на селекцијата на Бразил, како и на Реал Мадрид и Интер.

Роберто Карлос објасни дека групата инвеститори има за цел повторно да го засилат фудбалот во внатрешноста на Бразил, со фокус на развојот на млади таленти за националната репрезентација и на реорганизацијата на помалите клубови. “Наша цел е постепено да се вратиме во фудбалот во внатрешните делови на земјата, за да продолжиме со создавање на врвни таленти за бразилската репрезентација и да помогнеме во реструктурирање на клубовите”, вели Карлос.

Тој додаде дека планира да им помогне и на други клубови како Униао Сан Жао, каде што ја започна својата кариера, а сега таму игра неговиот внук. “Моја намера е подобро да ги запознаам овие клубови за да им помогнам да најдат спонзори и да го вратиме фудбалот во тие области на нивото кое го имаше во нашето време”, рече Роберто Карлос.

Интернасионал де Лимеира е основан во 1913 година во државата Сао Пауло и го достигна својот врв во 1980-те години, кога освои титула на сојузно првенство на Сао Пауло во 1986 година и стана шампион на втората бразилска лига две години подоцна. Во моментов, клубот е на врвот на табелата во Серија Ц, третата дивизија на бразилскиот фудбал, со 25 бода по 14 натпревари.

Купувањето на Интернасионал е дел од поширок тренд во бразилскиот фудбал, каде сè повеќе клубови нудат своите акции преку спортски друштва и влегуваат во приватна сопственост. Роналдо има претходно искуство со управување на фудбалски клубови, бидејќи беше сопственик и претседател на Крузеиро и најголем акционер во шпанскиот Реал Валјадолид.