Челзи – Реал Мадрид: Кој ќе му се придружи на Сити во финалето во Истанбул!?

После возбудливиот и неизвесен прв натпревар во шпанската престолнина, Челси се подготвува да го пречека Реал Мадрид на „Стемфорд Бриџ“ во реваншот од нивната полуфинална битка во Лигата на шампионите во среда навечер.

Нерешениот резултат 1:1 на „Естадио Алфредо ди Стефано“ минатата недела, ветува интересен меч, неизвесност но и голема борба во Лондон.

Челзи тешко губи сезонава во ЛШ

Поразот во реваншот од четвртфиналната пресметка со Порто на домашен терен претставува единствена загуба на „сините“ во досегашната сезона во Лигата на шампионите. Освен тоа тие допрва треба да примат повеќе од еден гол на еден натпревар сезонава 2020-21 – откако имаат седум меча без примен гол, а примија само четири гола на нивните 11 континентални натпревари досега.

Истанбул е на повидок, а одбраната може да биде најдобрата шанса за тимот на Тухел. Неговиот тим едноставно треба да се држи до она што го има направено во средата во Мадрид. Сепак, само два од нивните пет натпревари во Лигата на шампионите сезонава на домашен терен завршија со победа, откако Френк Лампард не можеше да ги победи Севилја и Краснодар на „Стемфорд Бриџ“ во групната фаза.

Од последните седум пати кога Челси избегна пораз на првиот натпревар од Лигата на шампионите на гостински терен, во пет од нив се пласираше во следната рунда, но Атлетико Мадрид успеа да го собори тој тренд исфрлајќи ги во сезоната 2013-14 турнир, а Реал се надева дека ќе ги следи стапките на своите локални ривали оваа недела.

Ако некој знае како до титулата во ЛШ, тоа е Зидан

Зидан сигурно знае како до успех во Лигата на шампионите, а поради интензивните шпекулации околу неговата иднина во Бернабеу, Французинот се наоѓа и под мал притисок. Имаат проблеми и во Ла Лига каде и покрај импресивната форма не можат никако да го стигнат Атлетико Мадрид кој им бега со два бода. Освен тоа, имаат еден крајно тежок меч во шампионатот следниот викенд кога треба да ја пречекаат Севиља.

Во 2019 и 2020 година Реал не успеа да стигне далеку во Лигата на Шампиони, а во претходните три пати кога Зидан го водеше тимот во полуфиналето во Лигата на шампионите, неговиот тим напредуваше во сите три наврати. Тоа беше во периодот на нивната доминација меѓу 2016 и 2018 година.

Само три славни имиња како Марчело Липи, Карло Анчелоти и Сер Алекс Фергусон повеќе пати стигнаа до финалето од Зидан.

Зидан за да ги зголеми сопствените надежи за слава, целосно е фокусиран на дуелот во Лондон. Конечно, полека с евратија повредените во екипата, а одбраната доби на цврстина. Постои шанса Варан да го пропушти овој меч поради повреда, но веројатно ќе стисне заби и ќе одигра барем 60-тина минути. Остануваат повредени само Карвахал и Лукас.

Но она што важеше за Челзи и за нивната цврста одбрана сезонава, важи и за Реал. Тие имаат серија од 19 натпревари без пораз, на кои примија само девет гола. Статистика што станува се поимпресивна кога ќе се земат предвид отсуствата на Серхио Рамос и Рафаел Варан – а мора да се додаде и дека ниту еден тим не успеа да ја наруши одбраната на Зидан повеќе од еднаш во натпревар од изненадувачката победа на Леванте пред повеќе од три месеци.