Салах ги шокираше фановите на Ливерпул: Ова е моја последна сезона во клубот

Ливерпул го победи Манчестер Јунајтед со 0:3 на „Олд Трафорд“ во третото коло од Премиер лигата.

Луис Дијаз постигна два гола, во 35. и 42. минута, додека третиот Мохамед Салах во 56. минута. Египетскиот крилен напаѓач му асистираше на Колумбиецот за двата гола и беше најдобро оценет поединец на натпреварот, со оценка 8,9. По натпреварот тој го коментираше договорот со Ливерпул кој влезе во последната година.

“Ова е мојата последна година во клубот и сакам да уживам. Имам долго лето зад мене во кое размислував многу и бев позитивен. Слободен сум да играм фудбал. Ќе видиме што ќе се случи следната година. Никој во клубот сè уште не ми зборувал за продолжување. Можно е да ја играм мојата последна сезона тука“, изјави 32-годишниот Салах за новинарите по натпреварот.

Египќанецот е меѓу најдобрите играчи кои играле за Ливерпул во историјата. Со него ја освои Премиер лигата и Лигата на шампионите. Тој одигра 352 натпревари и постигна 214 гола со 92 асистенции. Во сезоната 2017/2018. беше најдобар стрелец во Премиер лигата со 32 гола.