Реал му го нуди Хамес Родригез на Манчестер Јунајтед

Раководството на Реал Мадрид му ги понудиле на Манчестер Јунајтед колумбискиот репрезентативец Хамес Родригез, пренесува „ESPN“.

Според истиот извор „црвените ѓаволи“ побарале од агентот на Хамес Родригез да ги известува за неговата ситуација пред летниот преоден рок, со оглед на фактот дека веќе подолго време се шпекулира дека Колумбиецот ќе го напушти „Сантиаго Бернабеу“.

25-годишниот Колумбиец во неколку наврати истакна дека не е задоволен од статусот во Реал и дека сака поголема минутажа, а Пари Сент Жермен, Челзи и Интер се споменуваа како најзаинтересирани клубови.

И покрај тоа што за него нема место во стартниот тим, Хамес постигна седум гола на последните девет натпревари на кои играше, па јасно е зошто многу европски гиганти се интересираат за неговиот потпис.

Хамес Родригез е иначе клиент на Жорге Мендеш, агент на Жозе Мурињо и човек кој е во одлични односи со раководството на Манчестер Јунајтед.