Претседателот на Атлетико: Колку што јас знам Гризман ќе остане

Претседателот на Атлетико Мадрид, Енрике Сересо верува дека Антоан Гризман ќе остане во клубот по завршувањето на летниот преоден рок.

Францускиот напаѓач на големо се поврзуваше со Барселона, се пишуваше и дека неговата сопруга веќе барала куќа во Каталонија, но Сересо во изјава за „Кадена Коп“  порача дека според него Гризман ќе биде играч на Атлетико и наредната сезона.

„Колку што јас знам тој ќе остане во Атлетико Мадрид. Ништо не се промени, имаме договор, во одлични односи сме и тоа е тоа. Знаеме дека Светското првенство е голема работа за него и секако дека разговаравме“, изјави Сересо.

Треба да се спомене и дека претходно оваа недела, Гризман се огласи и порача дека сака да ја реши својата судбина пред почетокот на Мундијалот.

Светското првенство ќе се одржи од 14 јуни до 15 јули во Русија.