Меси за Мундијалот: Мојот сон е да го подигнеме пехарот

До почетокот на Мундијалот во Русија останаа нешто помалку од две недели, а репрезентациите со полна пареа се спремаат со цел да остварат што подобри резултати.

Од Светското првенство во Русија се очекува многу, посебно кога во прашање е селекцијата на Аргентина и Лионел Меси. „Гаучосите“ се надеваат дека Меси конечно ќе стигне до титулата шампион на светот, но конкуренцијата можеби никогаш не била поголема.

Меси во разговор со медиумите во Аргентина откри дека со нетрпение го чека почетокот на Мундијалот и дека неговата репрезентација е спремна да го даде максимумот.

„Големите фудбалски нации секогаш се главни фаворити на Мундијалот. Мојот сон секогаш е ист, а тоа е да играм во финалето и да го подигнам пехарот. Сигурно дека тоа ќе биде тешко кога ќе ја погледнете конкуренцијата. Секако, Германија е тука, а помеѓу фаворитите според мене се уште Бразил, Франција, Шпанија и Португалија. Ние можеби не сме помеѓу нив, но сите имаме ист сон и веруваме дека можеме да го оствариме ова лето“, изјави Меси.

Светското првенство во Русија стартува на 14 јуни со натпреварот помеѓу Русија и Саудиска Арабија.