Италијанскиот агент нема дилеми: Роналдо наскоро ќе објави дека е нов играч на Јувентус

Кристиано Роналдо се уште се наоѓа во центарот на вниманието поради шпекулациите дека ова лето ќе го напушти Мадрид и кариерата ќе ја продолжи во редовите на шампионот на Италија, Јувентус.

Минатата недела фудбалската јавноста остана изенадена кога сите светски медиуми и познати новинари објавија дека Кристиано Роналдо го напушта Мадрид и се сели во Јувентус.

На почетокот изгледаше дека сето тоа е само една од низата шпекулации, но набрзо беше јасно дека е нешто сериозно.

Италијанскиот агент Бепе Бозо истакна дека според него трансферот на Роналдо е завршен.

„Ги следам овие случувања со денови и со големо нетрпение очекувам да видам што ќе се случи на крајот. Кога се споменуваат вака големи трансфери, ако ништо не е сериозно веднаш добиваме демант. Она што мене ме убеди дека работата Роналдо оди во Јувентус е фактот што никој досега не демантираше. Роналдо сега ужива на заслужениот одмор, но верувам дека наскоро ќе објави дека е нов играч на „старата дама“, изјави Бозо.