Англичаните имаат посебно правило за ЕП – во нивниот тим нема „резерви“!

Фудбалерот на Кристал Палас, Еберечи Езе за медиумите откри интересна информација дека во репрезентацијата на Англија предводена од Герет Саутгејт нема да се користи зборот „резерви“.

Саутгејт сака со нов пристап да даде важност на сите фудбалери во тимот, па така на сите им ставил до знаење дека зборот „резерви“ нема да биде користен и место тоа фудбалерите кои не се од почетокот на теренот ги нарекува „финишери“.

„Не може да бидат важни само оние 11 кои се на теренот од почетокот. Важен е целиот тим. Кога победувате, тоа го правите како колектив, тоа мора да се разбере. Селекторот зборуваше за „финишери“, така ги нарекуваме фудбалерите кои добиваат шанса во продолжението. Тие треба да одиграат важна улога кога ќе се најдат на теренот не само оние во стартниот состав“, изјави Езе.

Англија во првиот натпревар на Европското првенство ќе игра против Србија в недела на 21:00 часот.