Англискиот второлигаш одбил да го донесе Ван Перси бидејќи е престар

Малку недостасувало холандскиот напаѓач, Робин Ван Перси оваа зима да се врати во англискиот фудбал по две и пол години поминати во Турција.

Искусниот 34-годишник на крајот се смести во родниот Феенорд, а пред договорот со клубот од Ротердам имаше неколку опции кои му биле понудени. Имало опција и да се врати во Англија, го сакале некои клубови, но Астон Вила дефинитивно не била еден од нив. Ван Перси бил понуден на славниот клуб од Бирмингем, кој одбил да го ангажира од причина дека е премногу стар за нивниот тим.

„Вистина е дека Ван Перси сакаше да дојде, дури беше и реално да го направиме тој трансфер. Имавме можност да го ангажираме Ван Перси, а знаете дека не се случува секој ден да се нудат големи играчи. Меѓутоа, многу размислувавме и донесовме одлука да не го донесеме. Нашата политика е таква што не не интересираат играчи постари од 30 години и проценивме дека подобро е трансферот да не се случи. Му посакуваме среќа во продолжението од кариерата“, изјави тренерот на Астон Вила, Стив Брус.

Инаку, Астон Вила оваа сезона се натпреварува во Чемпионшип каде што по 28 одиграни кола го завзема четвртото место на табелата со 50 бода и има серија од четири последователни победи.