Хрватска на чекор до трофејот во Дејвис купот

Тениската репрезентација на Хрватска поведе во Лил против Франција со 2:0 во финалето за трофејот на Дејвис купот.

Вториот денешен поен на хрватската селекција го донесе Марин Чилиќ кој беше подобар од Жоа Вилфред Цонга со 6:3, 7:5, 6:4.

Првата победа за Хрватска претходно ја донесе Борна Чориќ откако во три сета го нокаутираше Жереми Шарди со 6:2, 7:5, 6:4.

За освојување на титулата на Хрватска и е потребен уште само еден бод.

Првата меч топка Хрватска ќе ја има во сабота кога во двојки ќе се сретнат Иван Додиг и Мате Павиќ со Пјер Ербер и Никол Мау.

Ако Франција го добие овој натпревар одлуката за победникот ќе падне во недела кога на програмата се уште два сингл натпревари.