Фудбалските агенти заработија 888 милиони долари за трансфери во 2023 година!

Кога ќе го погледнете последниот извештај на Меѓународната фудбалска федерација (ФИФА), ќе сфатите зошто многу бизнисмени, но и поранешни фудбалери и фудбалски функционери се натпреваруваат да бидат менаџери или агенти.

Имено, ФИФА објави извештај според кој на менаџерите им биле исплатени рекордни пари за посредување во трансферите во 2023 година.

Во последната година, сметајќи го зимскиот и летниот преоден рок во машкиот фудбал, заработија неверојатни 888 милиони долари!

Оваа бројка претставува зголемување од 42,5 отсто во однос на минатата година и е поголема за повеќе од една третина во однос на претходниот рекорд поставен во 2019 година, објави ФИФА.

Еден од најголемите трансфери минатото лето Реал Мадрид го оствари со доведување на Џуд Белингам од Борусија Дортмунд за 103 милиони долари.

За овогодинешниот рекорд најголем придонес имаа англиските клубови кои потрошија 280 милиони американски долари за агентски услуги, додека клубовите од Саудиска Арабија се втори по трошење на агентски услуги со 86 милиони долари.

Извештајот на ФИФА ги исклучува трансферите направени во рамките на Премиер лигата, од еден англиски клуб во друг, односно трансфери на играчи од еден клуб во друг во Обединетото Кралство. Таму имавме мултимилионски трансакции како што се трансферите на Мојсес Каиседо, Деклан Рајс или Каи Хаверц, така што вкупната сума всушност е многу поголема!

Проблемот е што судовите во Британија и Германија ги отфрлија последователните наредби на ФИФА за ограничување на процентот што агентите можат да го заработат од посредување на трансфери.

Извештајот на ФИФА, исто така, откри дека таксите за агенти во женскиот фудбал за првпат надминале 1 милион американски долари. Бројот на зделки со агенти достигна рекордни 125, што е зголемување за повеќе од 20 отсто во споредба со 2022 година, а надоместоците изнесуваат 1,4 милиони долари.