Еден од најславните бразилски клубови експресно се врати помеѓу најдобрите

Реномираниот бразилски клуб Сантос експресно го обезбеди враќањето во бразилската Серија А по само една сезона помината во второлигашкото друштво.

На две кола пред крајот Сантос е на врвот во втората лига и веќе математички не може да падне под четвртата позиција. Најдобрите четири екипи од бразилската Серија Б обезбедуваат влез во Серија А, а Сантос е блиску и да ја обезбеди титулата бидејќи на две кола пред крајот има пет бода предност.

Во својата историја Сантос има осум титули шампион на Бразил и на оваа вечна листа е втор. Повеќе освои само Палмеирас кој 12 пати беше шампион. Најмногу титули Сантос освои со славниот Пеле кога пет пати по ред беше шампион (1961-1965). Потоа освојуваше уште титули во 1968, 2002 и 2004 година.

Пеле беше прва голема ѕвезда на Сантос, но подоцна во овој клуб настапуваа имиња како Робињо и Нејмар, па и Родриго кој сега го носи дресот на Реал Мадрид. Сантос е единствениот бразилски клуб за кој играше Нејмар пред доаѓањето во Европа и за овој клуб постигна 107 првенствени голови на 177 натпревари.