Започна „чистката“ во Манчестер јунајтед: Заминува фудбалерот кој помина осум години во клубот

Познатиот светски трансфер експерт Фабрицио Романо објави дека Манчестер Јунајтед останува без важен играч во ротацијата. На крајот од оваа сезона, триесетгодишниот шведски дефанзивец Виктор Линделоф ќе го напушти клубот како слободен играч. Според информациите на Романо, договорено е тој да замине по завршетокот на сезоната бидејќи има понуди од Шпанија и Италија.

Неговиот договор трае до 30 јуни, а на Трансфермаркт неговата вредност е проценета на десет милиони евра. Линделоф се приклучи на Јунајтед во летото 2017 година од Бенфика, откако тимот “Црвените ѓаволи” плати 35 милиони евра за него. Неговиот фудбалски пат започнал во шведскиот Вастерос, но уште на 16 години се преселил во академијата на Бенфика.

Во текот на престојот во англискиот гигант, тој одигра вкупно 283 натпревари во сите натпреварувања. Постигна четири гола и седум асистенции, додека оваа сезона настапи во првенството на 15 натпревари. За репрезентацијата на Шведска настапувал на 71 натпревар.