Алонсо пред Тотенхем: Со срце, но и со ладна глава во дербито!

Шест победи по ред против Тотенхем не се гаранција за седма. Тоа е пораката на Чаби Алонсо пред саботното лондонско дерби на „Стемфорд бриџ“, во кое од Челси бара страст, но и мирна глава.

За Алонсо ова ќе биде прво соочување со ривалството меѓу двата клуба. Наместо неговиот тим да се потпре на досегашната доминација, тој сака енергијата од трибините да ја претвори во паметна игра.

„Секое дерби носи посебна енергија и возбуда од трибините. Треба да ја искористиме на теренот, но и да ги контролираме емоциите, бидејќи на двете страни има многу страст. Сакаме фудбал со срце, но мора да играме и со глава и интелигенција“, порача Алонсо.

Челси влегува во дуелот како четвртопласиран во Премиер лигата. По нестабилниот период пред репрезентативната пауза, лондонскиот тим ги доби двата натпревара по враќањето на клупските обврски. Сега цели кон трета последователна првенствена победа, нешто што не му успеало по серијата од четири триумфи во јануари и февруари.

Традицијата е убедливо на страната на домаќинот. Челси славеше во последните шест лигашки пресметки со Тотенхем и го израмни својот најдолг победнички низ против овој ривал, поставен меѓу јануари 2000 и март 2002 година.

Уште понепријатни за гостите се бројките од „Стемфорд бриџ“: во последните 36 првенствени гостувања таму имаат само една победа, 11 ремија и 24 порази. По триумфот од 3-1 во сезоната 2017/18, Тотенхем освои само два бода од следните осум лигашки посети.

Up next: Tottenham Hotspur visit on Saturday. https://t.co/lV89PFa4Ui

— Chelsea FC (@ChelseaFC) October 21, 2026

Дербито носи и промена меѓу стативите на Челси. Мајк Пендерс ќе биде стартер, бидејќи Емилијано Мартинез е повреден откако на претходниот натпревар беше изнесен на носилки.

Алонсо има доверба во неговата замена. Пендерс веќе доби шанса на неколку куп-натпревари, а тренерот е задоволен и од неговата кратка минутажа против Евертон, кога, според него, ги покажал карактерот и квалитетите.

„Подготвен е и добро тренира. Токму за вакви ситуации имаме состав со повеќе опции. Целосно веруваме дека Мајк може да одигра многу добро“, истакна Алонсо.

Тој додаде дека летното доведување на Мартинез требало да ја зајакне конкуренцијата, додека Пендерс е голман и за сегашноста и за иднината, кој може да учи покрај искусниот колега.

Против Евертон, Челси ја зачува мрежата за првпат по 23 премиерлигашки натпревари. Со Пендерс на голот, ќе се обиде да врзе два меча без примен погодок, што не му успеало од декември минатата сезона.