Себаљос брутално му одговори на Симеоне: Очигледно е дека се уште не ги преболел двата порази во финалето на Лигата на шампионите од Реал Мадрид

Реал Мадрид синоќа на „Бернабеу“ го победи Лас Палмас со убедливи 4:1 во 20. коло од Ла Лига и скокна на првото место на табелата.

Гостите погодија уште во првата минута, но Килијан Мбапе со два погоди и Родриго и Брахим Дијаз по еднаш направија пресврт за Реал.

Гостите речиси половина час играа со играч помалку бидејќи во 64. минута директен црвен картон доби дефанзивецот Бенито Рамирез кој влезе во игра на почетокот на вториот дел.

Кралскиот клуб викендов на најдобар можен начин ги искористи киксовите на Атлетико и Барселона. Атлетико загуби од Леганес, Барселона ремизираше со Гетафе и Реал сега е прв со два бода повеќе од Атлетико и седум од Барселона.

Хрватскиот капитен Лука Модриќ мораше да го пропушти овој натпревар поради насобраните жолти картони, а во стартниот состав беше сосема соодветно заменет со Дани Себаљос, кој сезонава забележа 20 настапи, најмногу од клупата. Себаљос по натпреварот застана пред новинарите и ги разбранува страстите на навивачите.

Новинарите го прашаа за коментарите на тренерот на Атлетико, Диего Симеоне, кој коментирајќи ги наводните пропусти во корист на Кралскиот клуб на натпреварот против Селта, рече: „Не го гледав натпреварот. Ми кажаа какви работи се случија, но тие го прават ова 100 години.“ „Јас навистина не знам за што сте изненадени“.

На прашањето на новинарите, Себаљос рече: „Симеоне? Очигледно е дека се уште не ги преболел двата порази во финалето на Лигата на шампионите од Реал Мадрид“.