Њукасл му наредил на Исак да тренира сам

Александер Исак бил инструктиран од клупското раководство да тренира одделно од главната група.

Швеѓанецот, кој е трансферна цел на Ливерпул, вчера се врати на базата на “свраките”, откако претходно се подготвуваше на тренинг објектите на неговиот поранешен клуб Реал Сосиедад.

Останатите играчи исто така се вратија вчера од Република Кореја и добија одмор, а денес попладне Еди Хау организираше настан, на кој се поканети и семејствата на фудбалерите и штабовите. Според “Скај спортс” до Исак било упатено да се појави на базата откако останатите ќе си заминат.

Повеќето медиуми на Островот тврдеа дека евентуалниот трансфер на Швеѓанецот во Ливерпул зависи од тоа дали Њукасл ќе успее да привлече негов заменик. “Свраките” меѓутоа се на пат да го испуштат Бенјамин Шешко, кој е поблиску до Манчестер Јунајтед. Актуелните варијанти сега се Николас Џексон и Јоан Уиса.

Мерсисајдците во секој момент ќе го продадат Дарвин Нуњез на Ал-Хилал и веројатно ќе ги искористат парите од него за нова понуда за Исак. “Црвените” ќе добијат за Уругваецот сигурни 53 милиони, кои со бонусите може да достигнат до 65 милиони евра.