Меси не е пример за Јамал, има уште еден идол: „Тој е ѕвезда и фудбалска легенда“

Ламин Јамал полека прераснува во голема фудбалска ѕвезда, а многумина почнаа да го споредуваат со Лионел Меси, бидејќи играат на иста позиција. Меѓутоа, Јамал ги шокираше сите со изјавата дека има уште еден идол.

Шпанецот има само 17 години. Главни карактеристики му се брзината, агилноста и агресивноста, а оваа сезона во Ла Лига запиша пет гола и 10 асистенции.

Јамал моментално игра на позицијата десно крило, каде Меси остави огромен белег во фудбалската историја. Иако е поласкан од споредбите со Аргентинецот, идол на играчот на Барса е поранешниот соиграч на Меси.

„Имав пет години кога го видов Нејмар како игра за Сантос. Потоа две години подоцна го сретнав на Камп Ноу. Беше тоа неверојатно чувство. Точно, и Меси тогаш беше во Барселона, тој е фантастичен играч, но Нејмар е нешто друго. Тој отсекогаш бил и ќе биде мојот идол. Нејмар е ѕвезда и легенда на фудбалот“, истакна Јамал во интервју за Си-Ен-Ен.

Шпанскиот ас зборуваше и за тоа колку брзо станал популарен, и колку ужива во тоа чувство.

„Се се случи многу брзо. Тоа не е нормално за тинејџер, но убаво е. Прекрасно е чувството да се постигне успех. Сето тоа го оставам во минатото и гледам во иднината. Сепак, се трудам да уживам во моментот, бидејќи тоа е нешто што мајка ми ме научи уште од мали нозе“.

Звучи неверојатно, но Јамал се уште е ученик и има многу обврски покрај фудбалот.

„Морам да одам на час секој ден и да си ја работам домашната задача. И навистина ги извршувам моите училишни задачи секој ден. Сепак, тие се со разбирање и ако има некој важен натпревар, ме поштедуваат. Но, ако препознаат дека е полесен период во однос на клупските обврски, веднаш ми даваат дополнителна домашна задача“, рече Ламин Јамал.