Кандидатот за претседател на Барселона го откри планот за Меси: Како што тој ќе посака…

Кандидатот за претседател на Барселона, Виктор Фонт, откри дека имал разговори со клупската легенда Лионел Меси за можноста тој да се врати на Камп Ноу доколку победи на претстојните избори следниот месец. Фонт изјави дека има намера да му овозможи на Меси достојна можност за збогување од клубот „на начинот на кој самиот ќе избере“, а исто така му нуди и почесна титула претседател, објави Goal.com.

Изборната кампања во Барселона го достигна својот врв, а кандидатите се натпреваруваат за гласови пред изборите следниот месец. Фонт се смета за главен противкандидат на Жоан Лапорта и континуирано го нагласува својот стремеж за враќање на аргентинската фудбалска ѕвезда во клубот за „последниот танц“. Тој тврди дека имал разговори со Меси и открива дека неговиот тим работел на проектот за привлекување на клупската икона во текот на изминатите четири години.

„Да, разговаравме директно со Меси и луѓето близу до него. Станува збор за приватни разговори и секогаш сме сметале дека никој не треба да го користи името на Меси за предизборни цели. Нашата должност е да објасниме што сме подготвиле и, ако победиме, да го финализираме договорот кој ќе биде најдобар и за него и за клубот“, изјави Фонт за Мундо Депортиво.

„Од 2022 година, поттикнати од ентузијазмот на него и Чави, работиме на проектот за враќање на Меси во Барса по Светското првенство. Предлогот се базира на три столба: институционално, кое предвидува да прифати позицијата на почесен претседател; комерцијално, инспирирано од партнерства како оние помеѓу Џордан и Најк, што би можело да донесе значаен приход и да го искористи неговиот малцински удел во Интер Мајами за јакнење на присуството на американскиот пазар; и спортско, за да може да се прости од Барса и Камп Ноу на начин кој самиот ќе го одбере, било преку играње или преку пригодна церемонија“, објасни Фонт.

Фонт исто така ги изнесе своите општи цели за клубот и изрази желба да ја поправи тешката финансиска ситуација. „Нашата кандидатура е насочена кон професионализација и модернизација на клубот, интеграција на различни групи и заштита на институцијата од ризици, особено финансиски, за да се зајакне спортскиот проект, отплати долг и развие амбициозна социјална програма“, додаде тој.