Готово: Ветеранот Вилијан има нов клуб!

По втор и веројатно последен пат, искусниот крилен фудбалер се врати во татковината.

Овој пат, 37-годишникот облече дрес на Гремио, тим од Порто Алегре кој се наоѓа на 13. позиција во бразилската Серија А. Таму ќе му се придружи на Артуро Мело и Мартин Брајтвајт, поранешните играчи на Барселона.

Некогашниот играч на Челзи и Арсенал летово доби слобода да избере нова средина, бидејќи му истече договорот со екипата на Фулам. Тој на Крејвен Котиџ помина две и пол години, со кратка епизода во Олимпијакос.

Стана јасно дека некогашниот брзоног фудбалер веќе нема физичка подготвеност да го одржи својот препознатлив стил на игра, па сосема природно е што се одлучи за враќање во Јужна Америка и завршување на успешната кариера.

Вилијан веќе еднаш од Лондон се врати во Бразил, кога во 2021 година од редовите на „топчиите“ премина во својот младински клуб Коринтијанс. По само една сезона повторно се врати во престолнината на Англија, но сега изгледа дека дефинитивно е завршена неговата епизода во Европа.

Вилијан во својата кариера настапуваше и за Шахтјор и Анжи од Махачкала, а во текот на седумте години на Стамфорд Бриџ освои две титули во Премиерлигата, Лигата на Европа, ФА купот и Лига купот.

🚨✍🏽 Willian has completed his medical at Gremio and will sign his contract now. pic.twitter.com/c5PdWAxCXc

— Fabrizio Romano (@FabrizioRomano) September 5, 2025