Фудбалер од Премиер лигата е уапсен

Познат фудбалер од тим во Премиер лигата, чиишто детали не се откриваат, е уапсен во централниот дел на Лондон под сомнение за напад, учество во тепачка и нарушување на јавниот ред.

Од полицијата соопштија дека инцидентот се случил во раните часови во саботата во областа Вест Енд. Властите примиле дојава за напад во 00:47 ч. по локално време. Подоцна, локалните медиуми неофицијално објавија дека станува збор за десниот бек на Кристал Палас – Даниел Муњос.

29-годишниот играч е задржан на местото на настанот по две обвинувања за напад и едно за учество во тепачка. Повредениот бил пренесен во болница со рани кои според полицијата не се опасни по живот. Според информации обезбедени на BBC Sport, фудбалерот е пуштен на слобода со кауција додека истрагата продолжува. Поради правни причини, неговото име не може да биде откриено.

Во Обединетото Кралство е реткост полицијата да го објавува или потврдува името на уапсено лице. Оваа практика е воведена по истрагата „Левинсон“ за британските медиуми во 2012 година. Според препораките, имињата на осомничените треба да се откриваат само во „исклучителни и јасно дефинирани околности“. Обично името се соопштува јавно само по покренување официјални обвиненија.