Eден фудбалер морал да се извинува пред целиот тим: Шпанците открија драма во Мадрид!

Повеќе од еден месец траеше „тивкото исчезнување“ на дефанзивецот Асенсио од тимот на Реал Мадрид, но конечно е расветлено. Несогласувањето со тренерот Алваро Арбелоа беше причина за неговото ненадејно и долго отсуство од листата на играчи, а ситуацијата се реши дури откако играчот се извини на целата соблекувална за своето однесување, пишува Марка.

Целиот „случај Асенсио“ започна на 11 март. Фудбалерот беше изоставен од стартната постава за натпреварот против Манчестер Сити, што многу го вознемири и денови наназад приговараше на тренерот. Асенсио беше убеден дека заслужува место меѓу почетната единаесетка, особено поради жртвата што ја направи за да биде подготвен за дуелот против Селта неколку дена порано.

Реал Мадрид пристигна во Виго со намалена одбрана – Милитао и Алаба беа повредени, а Хујсен суспендиран. Иако Асенсио имал сериозни проблеми со вратниот столб добиени против Бенфика, тој стиснал заби и играл заедно со Рудигер. Сепак, против Сити, Арбелоа го остави на клупа, претпочитајќи го Хујсен.

По неколку дена, тензијата меѓу тренерот и играчот достигна врв. Откако беше резерва против Сити, Асенсио требаше да запoчне против Елче. Меѓутоа, на самиот ден на натпреварот, непосредно пред утринскиот тренинг, Асенсио со докторот влезе во канцеларијата на Арбелоа. Го извести тренерот дека чувствува лесни мускулни болки и дека не е подготвен за игра. Оваа ненадејна вест, заедно со претходните приговори, го налутија Арбелоа.

Оваа ситуација директно го засегна Антонио Рудигер. Тренерот на германскиот дефанзивец, кој требаше да одмара пред реваншот против Сити, му рече дека сепак ќе мора да игра против Елче бидејќи Милитао и Алаба останале повредени. Промената го вознемири Рудигер, кој строго се држи до својот протокол за подготовка за натпревари.

Не му се допадна фактот дека во последен момент беше ставен во составот, што бараше поголем напор од препорачаниот и носеше ризик. Така „случајот Асенсио“ престана да биде само проблем меѓу тренерот и играчот, туку се прошири низ целата соблекувална.

Асенсио потоа ја пропушти средбата со Елче, не отпатува во Манчестер, ниту беше вклучен во составот за градското дерби, иако истовремено тренинзите ги изведуваше нормално. Причината беше јасна: Арбелоа бараше Асенсио да му се извини на целиот тим.

Тренерот е познат по строгиот став кон недисциплина и ја гледа како проблем на колективот, а не како личен конфликт. Иако Асенсио му се извини лично на Арбелоа, тренерот инсистираше тоа да го направи пред сите. Додека тоа не се случеше, за него немаше место во тимот.

Ситуацијата се искомплицира бидејќи Асенсио првично не ја признаваше потребата за извинување пред своите соиграчи. На еден од состаноците пред тренингот, Арбелоа прашал: „Има ли некој што сака да каже нешто?“, давајќи му можност да истапи. Но, дефанзивецот ја наведнал главата и молчел. Без извинување, продолжи да отсуствува од листата повикани.

Меѓутоа, на социјалните медиуми се појавија гласини кои неговото отсуство го поврзуваат со ноќен живот и непрофесионализам. Свесен дека неговиот случај стана јавна тема, Асенсио одлучи да ги прекине шпекулациите.

Се извини на соблекувалната за своето однесување по натпреварот со Сити и за ненадејното повлекување од настапот против Елче. По извинувањето, беше вратен на листата за натпреварите против Мајорка и Баерн, иако не доби минути игра. Така беше завршена оваа приказна.