Артета ќе се откаже од тројца фудбалери за ѕвездата на Њукасл?

Арсенал предолго чека на титула во Премиер лигата, уште од далечната 2004 година. Во последните две сезони беше блиску, но не доволно добар за да биде пред Манчестер Сити, додека оваа сезона Ливерпул е неприкосновен и изгледа дека само чудо може да го спречи да стане шампион на Англија.

Менаџерот на „топџиите“ Микел Артета откри каде е горливиот проблем на неговиот тим, иако тоа не е од вчера и долго се зборува и пишува за тоа, но изгледа дека дојде време да се направат конкретни нешта и да се засили Арсенал на позиција класичен напаѓач.

Веќе пишувавме за желбата на Артета да го види во Арсенал Брентфордовиот Брајан Мбеумо, но тој е крилен напаѓач, додека вистинската „деветка“ ќе се бара во Њукасл.

Артета, според информациите од Англија, сака што побрзо, можеби веќе во јануари, во екипата да го види напаѓачот на „свраките“ Александар Исак, кој оваа сезона блеска и денес е прогласен за најдобар играч на Премиер лигата за месец декември.

Сопственикот на тимот од Лондон, Стен Кроенке, не сака да издвои огромни пари за купување на Исак, па Артета наводно одлучил да се обиде да продаде тројца фудбалери за да обезбеди средства за доведување на Швеѓанецот.

Тројцата се напаѓачот Габриел Жезус, играчот за врска Томас Парти и универзалецот Олександр Зинченко.

Се разбира, допрва ќе се види дали Артета ќе може да ги продаде сите тројца оваа зима, како и дали Њукасл воопшто сака да се откаже од еден од своите најдобри играчи сред сезона, бидејќи овој тим се бори за пласман во Лигата на шампионите и е на прагот на финалето на Лига Купот, откако во првиот натпревар од полуфиналето го победи токму Арсенал во Лондон со резултат 2:0.

Исак беше стрелец на првиот гол на тој натпревар што се одигра пред три дена.

Шведскиот репрезентативец има договор со Њукасл до 30 јуни 2028 година. Неговата моментална вредност е 75.000.000 евра според „Трансфермаркт“, но тешко дека Њукасл воопшто би разговарал за негова продажба без 100.000.000 евра.