Палота до Барселона: Не се извинувајте, испратете ми го Меси!

Бразилецот Малком крена голема „прашина“ на трансфер пазарот.

Малком веќе беше виден како нов играч на Рома, но место тоа на крајот заврши во редовите на Барселона.

Денес по повод овој неверојатен пресврт на трансфер пазарот се огласи и првиот човек на Рома, Џејмс Палота.

„Барселона се однесуваше неморално. На денот кога Малком требаше да потпише со нас, директорот Мончи беше во контакт со менаџерот, договорот беше постигнат. Имаме доказ, можеме да ги повикаме и луѓето од Бордо да сведочат. Вчера ме побараа од Барселона и ми се извинија, но не можам да го прифатам тоа извинување. Единствен начин да го прифатам нивното извинување е да ни го испратат Лионел Меси“, саркастичен беше Палота.

Палота потоа одговори и на забелешката „зошто се буни кога ништо не е потпишано“.

„Тоа се глупости. Сите знаат како функционираат работите во оваа работа. Тргнете ги на страна официјалните работи, однесувањето на Барселона не е етички. Не е морално. Малком сакаше да дојде кај нас, го посакуваа Лестер и Евертон, но немаа официјални понуди. Дури се договоривме и во неговиот договор да има откупна клазула од 120 милиони евра“, изјави првиот човек на „волчицата“.