Рускиот дефанзивец: Рамос ни покажа како да го запреме Салах

Русија на Мундијалот ќе игра во група со Саудиска Арабија, Египет и Уругвај.

Стоперот на Русија, Илија Кутепов со некоректна изјава ги налути фановите на Египет. Русија на 19 јуни ќе се сретне со Египет во рамките од второто коло од групата во која уште се Уругвај и Саудиска Арабија, а се очекува за тој натпревар да биде спремен најдобриот играч на Египет, Мохамед Салах.

Кутепов руските новинари го запрашаа дали се плаши од Салах, со оглед на тоа што неговата Спартак Москва и Ливерпул играа во иста група во Лигата на шампионите минатата сезона.

„Не се плашам на основна од она што го видов во тие натпревари. Всушност, неодамна видовме како може да го запрете Салах, тоа на сите ни го покажа Серхио Рамос“.

„Морам да признаам дека не бев баш несреќен кога Салах се повреди во финалето од Лигата на шампионите“, изјави Кутепов и го навлече гневот на сите кои ја симпатизираат репрезентацијата на Египет.

Сепак, Русинот за крај малку го ублажи изговореното.

„Му посакувам брзо опоравување, би бил среќен доколку играм против него на Мундијалот. Играњето против такви мајстори те прави подобар фудбалер“, заврши дефанзивецот.