Дома Моторспорт Ферстапен победи, па го нападна Расел: Уживав кога видов што му се случи

Ферстапен победи, па го нападна Расел: Уживав кога видов што му се случи

Ферстапен победи, па го нападна Расел: Уживав кога видов што му се случи

Ниту победата во Лас Вегас не го одвлече вниманието на Макс Ферстапен од пресметката со Џорџ Расел. По четвртиот сезонски триумф, возачот на Ред Бул испрати остри пораки кон Британецот и призна дека се израдувал кога го видел неговиот проблем на патеката.

Расел беше во борба за победата, но во 48. круг, при обид да го престигне тимскиот колега Кими Антонели, ги блокираше тркалата и удри во заштитната ограда. Продолжи да вози, но трката ја заврши на деветтото место, далеку од подиумот.

Ферстапен не покажа сочувство за ривалот со кого претходно се судри и на последниот слободен тренинг.

„Многу зборува надвор од патеката. Искрено, тоа воопшто не ми пречи, бидејќи е толку под моето ниво што не гледам смисла да влегувам во расправа со него“, изјави Холанѓанецот на прес-конференцијата.

Потоа уште подиректно ја коментираше грешката на возачот на Мерцедес.

„Денес кармата беше кучка. Кога погледнав во ретровизорот и видов што се случува, си помислив: ‘Фантастично, денот ми станува сè подобар!’ А кога прв ја минав целта, денот беше комплетен“, додаде Ферстапен.

Новата расправија започна уште на третиот слободен тренинг. Двајцата се најдоа еден покрај друг додека се подготвуваа за брз круг. Ферстапен помина пред Расел, Британецот се обиде да му возврати, по што дојде до контакт. Холанѓанецот потоа му покажа среден прст, а стјуардите му изрекоа официјално предупредување за непредвидливо возење.

Расел по тренингот порача дека нема да го прифати таквото однесување.

„Тоа им го прави на многу возачи од недела во недела и сите го прифаќаат. Јас нема да дозволам некој така да се однесува со мене, како да е поголем и подобар од сите. Некој мора да му се спротивстави“, изјави Британецот за Скај Спорт Италија.

Нетрпеливоста меѓу нив има подолга историја. Во спринтот во Азербејџан во 2023 година, контактот на патеката продолжи со жестока расправија. Во Катар, кон крајот на 2024 година, односите дополнително се влошија откако Ферстапен ја загуби пол-позицијата поради попречување на Расел во квалификациите.

Тогаш Холанѓанецот го обвини ривалот дека пред стјуардите инсистирал на казна и порача дека повеќе нема почит кон него. Расел, пак, тврдеше дека Ферстапен му се заканувал оти ќе го забие во ѕид. Минатата година во Шпанија следуваше нов судир, за кој возачот на Ред Бул беше прогласен за виновен и доби казна од десет секунди.

Во Лас Вегас зад Ферстапен завршија Ландо Норис и Оскар Пјастри. Холанѓанецот сега е втор во генералниот пласман со 304 бода, додека Расел е четврти со 264. Кими Антонели веќе ја обезбеди светската титула, а сезоната треба да заврши со трките во Катар и Абу Даби.

Коментари
Прочитајте поврзани статии
Load More In Моторспорт

Проверете

Хамилтон со порака до Ферари: Со поголема поддршка можев против Антонели

По новиот судир со Леклер во Лас Вегас, Хамилтон оцени дека посилна поддршка од Ферари мож…