Десет нови студенти годишно ќе добиваат целосна финансиска поддршка од Формула 1, која обезбеди 2,4 милиони фунти за тригодишно продолжување на својата програма за инженерски стипендии.
Поддршката ги опфаќа и школарината и трошоците за живот, а е наменета за студенти од недоволно застапени средини. Од почетокот во 2021 година, програмата им помогнала на 48 студенти. Новите стипендии ќе се доделуваат секоја година, заклучно со учебната 2028/29.
Студирањето е предвидено на универзитетите Стратклајд, Кембриџ и Оксфорд, на Империјал колеџ во Лондон, како и на италијанскиот универзитет за моторни возила на Емилија-Ромања — МУНЕР.
Колку значи ваквата помош покажува сведоштвото на еден стипендист од прва година на Оксфорд. Тој објаснил дека покриените трошоци му овозможиле целосно да се посвети на студиите, наместо да се грижи дали ќе има пари за следниот оброк.
Продолжувањето на стипендиите беше објавено заедно со првиот извештај на Ф1 за општественото влијание. Според податоците во него, образовните програми опфатиле повеќе од 500.000 млади од 71 земја. Во општествени иницијативи учествувале сите 24 домаќини на гранпри-трки, сите десет екипи од минатата година, како и Ф1 и ФИА.
Значаен дел од образовните активности е програмата „Learning Sectors“, развиена со Британскиот совет. Таа започнала во јануари 2025 година во училишта во Велика Британија, Јужна Африка, Индија и Бразил. Преку научно-технолошки проекти и натпревари во програмирање, децата од седум до 16 години развиваат вештини за пресметковно размислување.
Во оваа иницијатива веќе учествувале над 150.000 ученици од повеќе од 700 училишта. Проширувањето во Кина, Мексико и Шпанија во текот на 2026 и 2027 година треба да опфати уште 250.000 ученици.
Поинаков пристап има „The Next Grand Prix“, проект започнат во 2022 година со добротворната организација „Social Mobility Business Partnership“. Учесниците се натпреваруваат со предлози за нова локација за трка во Ф1. Преку него досега се обезбедени повеќе од 600 места за практично искуство, од кои 126 во 2025 година. Проектот ѝ донел на Ф1 признание за иновации на британските награди за општествена мобилност.
Извештајот ги издвојува и локалните активности на организаторите на трките. Академијата „MIA in Schools“ во Мајами вклучила 21 студент на додипломски и постдипломски студии во области како инженерство, дизајн и маркетинг, а во четвртокот пред ланската трка примила и 150 локални гости. За продажба на храна и пијалаци биле избрани 15 локални мали бизниси, од кои десет целосно или делумно во сопственост на жени.
Во Лас Вегас, пак, картинг-кампот „F1 Drive“ собрал 240 тинејџери од 13 клубови на организацијата „Boys & Girls Clubs of Southern Nevada“.
Фото: The Race
Учество во игри на среќа е дозволено за лица со 18+ години. Играј одговорно!