Херта не сака уште една сезона во Ф2, но за Инди 500 нема дилема

Колтон Херта сè уште нема одговор каде ќе вози во 2027 година, но има јасна желба: повторно да настапи на Инди 500. Американецот би ја прифатил можноста за враќање на славната трка, додека неговиот обид преку Формула 2 да се доближи до Формула 1 не оди според очекувањата.

Возачот на Хајтек веќе порача дека не е заинтересиран за втора сезона во Ф2. На две рунди пред крајот на првенството, 26-годишниот Херта нема подиум и е далеку од пласманот што му е потребен за бодовите за суперлиценца.

Токму тие бодови беа клучната причина за неговата преселба од Индикар во Формула 2, откако претходните обиди да ги исполни условите за дебитантски настап во Ф1 не вродија со плод. Сега следниот чекор во неговата кариера останува неизвесен.

„Не знам како ќе изгледа следната година за мене. Но, ако добијам можност, сто проценти би сакал да возам на Инди 500“, изјави Херта.

Враќањето на таа трка било подготвено и за 2026 година, но планот пропаднал откако две рунди од Ф2 биле презакажани во Мајами и Монтреал. Возачот кој ја има поддршката од Кадилак не го крие разочарувањето што морал да се откаже од настапот.

„Секогаш сакам да учествувам на Инди 500. Штета што годинава не можев. Сè беше договорено“, објасни Американецот.

За тешкото приспособување на Херта зборуваше и извршниот директор на Формула 2, Бруно Мишел. Тој призна дека очекувал подобар тек на дебитантската сезона, но не се сомнева во квалитетите на возачот.

Според Мишел, и Херта и луѓето во шампионатот можеби ја потцениле разликата меѓу начинот на работа во Ф2 и оној во тимовите од Индикар. Особено проблематични за Американецот биле квалификациите.

Мишел посочи дека во сесија од 30 минути возачот мора брзо да го извлече вистинското време, со само еден или два брзи круга на еден сет гуми. Ограниченото време на патеката е дел од подготовката за Формула 1, каде што условите се слично строги.

Сепак, првиот човек на Ф2 не смета дека сезоната на Херта треба да се оцени како целосно промашување. Потсети дека Американецот имал и добри трки, а искуството од оваа категорија може да му користи понатаму. Неговата надеж е Херта да ги заврши преостанатите настапи со подобри резултати.