Финалето во Лигата на шампиони за првпат во нов термин, ќе се игра три часа порано!

УЕФА донесе одлука финалето на Лигата на шампиони да не се одржува во вообичаениот ноќен термин.

Оваа година, финалето во Будимпешта, кое е закажано за 30-ти мај, ќе започне од 18 часот по средноевропско време, а не од 21 час како досега.

Оваа одлука претставува значителна промена и има за цел да им овозможи на навивачите да го следат најзначајниот натпревар од сезоната заедно со семејствата во поповолен дел од денот.

Навивачите кои патуваат за натпреварот ќе имаат полесен пристап до јавниот транспорт по завршувањето на натпреварот, што ќе овозможи побезбеден и покомфортен повраток дома.

Покрај тоа, градовите кои ќе бидат домаќини на финалето ќе имаат корист од оваа промена, бидејќи навивачите ќе имаат повеќе време за славење и дружење по натпреварот.

“Со оваа промена, искуството на навивачите го ставивме во центарот на вниманието. Финалето на Лигата на шампиони е врвот на фудбалската сезона, а новиот термин ќе го направи натпреварот достапен, инклузивен и поимпресивен за сите учесници. Новиот термин за саботното финале значи дека натпреварот ќе заврши порано, дури и ако вклучи продолженија или пенали, давајќи им на навивачите шанса да го искористат остатокот од вечерта во друштво со пријателите и семејството”, изјави претседателот на УЕФА, Александер Чеферин.