Toмовски: Секој натпревар на ЕП ќе биде посебен, нашата цел е да го дадеме максимумот!

Македонскиот репрезентативен голман Мартин Томовски, кој како последен интернационалец се стави на располагање на стручниот штаб и ги стартуваше подготовките за Европското првенство 2026, смета дека пријателските средби и подготвителниот турнир се од исклучително значење во финалната фаза од подготовките.

Томовски, кој брани во втората германска Бундеслига и е меѓу најконстантните во редовите на Битигхајм, истакнува дека целта е јасна – репрезентацијата да го дочека шампионатот максимално подготвена и тактички стабилна.

„Добро се познаваме, иако има некои новитети. Долги години сум во репрезентацијата, имаме одлична атмосфера. Имав мала поштеда, добро ми дојде, се приклучив во новата година, здрав и со големи амбиции и мотивација. Според мене, многу е подобро времето да го користиме на пријателски натпревари, бидејќи таму може да видиме вистински што правиме добро, а што грешиме. Тоа ќе биде одлична увертира за нас и селекторот да видиме до каде сме. Се надевам на добар подготвителен турнир во Швајцарија, со желба да останеме здрави и тоа искуство да го пренесеме на ЕП. Данска е апсолутен фаворит, Португалија е селекција во подем, тука е и Романија која е зрел и искусен тим, иако е подмладен. Секој натпревар ќе биде од посебен карактер, ама нашата цел е да дадеме максимум и да се надеваме на позитивен резултат“, изјави Томовски.