Дали Слот ги изгуби конците – еве што кажа тренерот на Ливерпул по шестиот пораз во седум натпревари

Тренерот на фудбалерите на Ливерпул Арне Слот делуваше како некој кој бара изговори по елиминацијата од Кристал Палас во осмина финалето на Карабао купот.

Ливерпул вчера вечер беше поразен на „Енфилд“ со резултат 0:3, што го прави шестиот пораз во последните седум натпревари. Сепак, играше вториот, трет состав составен од академци, но не покажаа ништо на теренот и дваесетина минути пред крајот „Енфилд“ почна да се празни. Тоа е јасен сигнал дека е потребна реакција и дека навивачите го губат трпението.

Зошто Слот одлучи да ги изостави повеќето првотимци од овој натпревар?

„Сметав дека тоа е правилната одлука и не го променив мислењето. Направив нешто слично и минатата година во вакви рунди. Постојат многу причини зошто изгубивме пет од шест или шест од седум натпревари. Ниедна од нив не е доволно добра за да ги прифатиме толку многу порази.

Дури и нашите стартери би имале проблем да најдат добар резултат против Палас”, изјави Холанѓанецот.

Тој став не е сосема точен, бидејќи Ливерпул минатата сезона играше со Коди Гакпо, Луис Диаз, Доминик Собослај и Енди Робертсон против Брајтон, додека од клупата влегоа Мо Салах, Дарвин Нуњез, Ибрахима Конате, Алексис Макалистер… Немаше толку многу тинејџери.

„Ги видов стартните 11 на Сити и тие немаа ниеден стартер од викенд натпреварот, но се чувствуваше како да е тоа нивниот најдобар тим. Тоа е голема разлика. Челси може да го внесе Естевао. Денес, дури иако направив две промени, имавме шест тинејџери.

Нашиот тим можеби не е толку голем колку што луѓето мислат дека е. Овој клуб отсекогаш го користел Лига купот за да им даде шанса на играчите од академијата. Не се промени ништо”, забележа тој.