Виери гледа добри работи во Јувентус: Скудетото мораше некогаш да го изгубат

Aктуелниот шампион Јувентус тешко дека оваа сезона ќе ја одбрани титулата во Серија А, а „старата дама“ беше елиминирана и од Лигата на шампионите.

Навивачите на Јувентус секако не се задоволни од резултатите кои ги бележат црно-белите оваа сезона. Сепак, поранешниот репрезентативец на Италија, Кристијан Виери гледа и нешто добро.

„Ако девет пати во низа го освојувате првенството, порано или подоцна ќе го изгубите. Можеше да се случи минатата или следната година, но мораше да се случи. И му се случи на Пирло. Без разлика на критиките, ми изгледа дека некои луѓе не ја разбираат ситуацијата. Јувентус доби играчи размислувајќи за иднината. Киеза е иднина, Кулушевски, Мекени и Артур се иднината, Де Лихт, Демирал, Бентакур…исто така. Било кој клуб треба да размислува подеднакво и на сегашноста и на иднината“.

Зборуваше Виери потоа за Роналдо.

„Купувањето на некој играч, кој и да е не гарантира освојување на Лигата на шампионите. Ви треба тим и среќа. Со Роналдо во екипата шансите се зголемија, но како што кажав тоа не е гаранција за успех. Меси шест години не ја освојуваше ЛШ, Сити и ПСЖ никогаш немале успех во Европа“, изјави Виери.