Позната и следната дестинација: Мората го напушта Челзи по само една сезона?

Шпанскиот напаѓач, Алваро Мората минатото лето го напушти Реал Мадрид и одлучи кариерата да ја продолжи во Челзи, но во Англија не се покажа во најдоброто издание во досегашниот дел од сезоната.

Мората на „Стемфорд Бриџ“ пристигна како замена за Диего Коста, но јасно е дека не може да биде задоволен од своите игри во досегашниот дел од сезоната. Англиските медиуми пишуваат дека постои можност Мората по само една сезона да ги напушти „Сините“, а на масата има неколку интересни понуди.

За доведување на шпанскиот напаѓач од Реал Мадрид најмногу заинтересиран беше Конте, но како што сега стојат работите ова ќе биде последна сезона за италијанскиот стратег во Челзи. „The Sun“ пишува дека Мората сериозно размислува за тоа на лето повторно да ја промени средината, особено доколку „Сините“ не се пласираат во Лигата на Шампионите.

Наводно, интерес за Мората повторно покажа Јувентус, каде што шпанскиот напаѓач играше со голем успех. Но, за Јувентус проблем претставува платата на Мората кој годишно заработува осум милиони евра во Челзи, додека најплатен играч на Јувентус е Гонзало Игуаин со 7,5 милиони евра по сезона.

Исто така, споменатиот медиум пренесува дека Јувентус не е единствениот клуб кој покажал интерес за Мората. Овој 25-годишен напаѓач има понуда и од еден клуб од Кина, но прашањето е дали Мората уште од сега сака да си оди на Далечниот Исток.