Мурињо ја подготвува првата голема работа во Фенербахче. Сака да донесе голем талент од Реал

По разделбата со Рома, Жозе Мурињо не беше долго без работа. Славниот Португалец дојде во Истанбул каде ќе го тренира Фенербахче за годишна плата од 10 милиони евра. Мурињо потпиша на две години, а еден од првите потези што ги направи во гигантот од Истанбул беше повикот до неговиот поранешен клуб Реал Мадрид да го убеди раководството да го испрати Арда Ѓулер (19) на позајмица.

Еден од најголемите турски таленти некогаш дојде во Реал од Фенер минатата година, каде потпиша шестгодишен договор. Сепак, младиот офанзивец не игра добро во Мадрид, ниту поради огромната конкуренција, ниту поради бројните повреди, па се појави на само 10 првенствени натпревари. Но, и покрај ова, за само 373 минути поминати на теренот постигна дури 6 гола.

Со оглед на тоа што од следната сезона во нападот на Реал треба да се засили и онака страшната конкуренција на Килијан Мбапе и Ендрик, јасно е дека на Ѓулер ќе му биде многу тешко да се натпреварува за минути. Токму затоа, според шпанските медиуми, Мурињо стапил во контакт со Реал и му предложил да го вратат Ѓулер во Фенер на позајмица до крајот на сезоната.