Македонија против Чешка за одмазда и пласман во следната фаза

Ракометната репрезентација на Македонија попладнево од 16 часот во „Штадхале“ во Виена го игра мечот од 2-то коло на Европското првенство против Чешка.

Со селекцијата на Чешка имаме одиграно дури 14 мечеви, од нив тие се радувале на шест победи, ние на пет, три дуели завршиле нерешено.

 Последниот натпревар против Чешка беше пред две години на Европското првенство кога во изедначен меч загубивме со 25:24. Манасков по истекот на времето имаше пенал, можеше да ја спаси нашата селекција од пораз, но голманот Мрква беше победник.

Македонија веќе запиша една победа на ЕП во првото коло кога ја победи репрезентацијата на Украина со еден гол разлика, па со победа денес практично ќе го обезбедеме пласманот во следната фаза.

Дуелот ќе го судат Мирза Куртагиќ и Матијас Ветервик од Шведска, а селекторот Брестовац нема дилема дека ова е најважниот натпревар за нас и го нарече „мало финале“.

„Ова е едно мало финале за нас бидејќи со победа таму би се пласирале во следната рунда, па порелаксирани би го дочекале дуелот со Австрија. Мислам дека сме спремни да го направиме тој чекор плус, очекувам подобра игра во нападот и во одбраната и наша победа на крајот. Чешка е солидна репрезентација, често играме против неа и знае да ни создаде проблеми, но јасно е дека не е несовладлива. Треба да одиграме добро, да ги запреме нивните главни играчи и со тоа да завршиме голем дел од задачата“, изјави Брестовац.