Буфон можел да заврши и во Манчестер Сити и во Манчестер Јунајтед (ВИДЕО)

Италијанецот зборуваше како во разни фази од кариерата можел да заврши во Англија.

Голманот на Пари Сен Жермен откри дека во различни моменти од својата кариера можел да заврши на двете страни во Манчестер – на црвената и сината. Интерес покажувале и Јунајтед и Сити, откри Италијанецот во разговорот со Рио Фердинанд за „БТ Спорт“.

„Кога бев дете и играв за Парма, Фергусон внимателно ме следеше две или три години и секогаш испраќаше скаути да ме гледаат, но во тој момент Парма беше мојот свет и не ми се заминуваше“,зборуваше Буфон.

Понудата од Манчестер Сити имал кога овој клуб започнувал да се изградува во тоа што е денес.

„Подоцна имав голема понуда од Манчестер Сити кога започнаа да го градат тимот и да станат еден од најголемите во Европа. Сакаа мојот потпис да биде прв. Но јас избрав да останам во Јувентус“, објасни легендарниот голман.

Како што е добро познато Буфон цели 17 години го бранеше голот на Јувентус и не замина дури и кога овој клуб беше исфрлен во Серија Б после аферата со наместени натпревари (Калчополи). Во редовите на Пари Сен Жермен се одлучи да премине изминатото лето и ова е негов трет клуб во кариерата после Парма и Јувентус.