Буфон: Зачувување на предноста е наша цел и наша должност

Голманот на Јувентус, Џанлуиџи Буфон зборуваше за медиумите на денешната прес-конференција пред утрешниот натпревар против Интер.

Јувентус неодамна беше сигурен лидер на табелата и имаше шест бодови предност во однос на Наполи, но потоа следуваше реми против Кротоне (1:1) и пораз од Наполитанците.

„Црно-белите“ утре го играат дербито во Милано против Интер и доколку не победат ќе му дадат прилика на Наполи на три кола пред крајот да го превземе првото место.

„Не освоивме пет важни бодови во последните натпревари, но и понатаму сме на првото место на табелата, иако сега предноста е мала. Мораме истата да ја сочуваме до крајот на сезоната. Тоа е наша цел и наша должност“, изјави Буфон.

Италијанските медиуми пренесуваа дека Буфон имал жестока расправа во соблекувалната со клупскиот колега Мехди Бенатија и го обвинувал за грешката која претходела на голот на Наполи.

Буфон истакна дека тоа се измислени приказни.

„Тоа се обиди за дестабилизирање на екипата. Никој за време на моите 17 години во Јувентус не вперил прст во соиграчот и никој никого не обвинувал за пораз, тоа нема да се случи додека сум јас капитен на овој тим“, истакна легендарниот голман.