
Вардар требало да добие пенал во момент кога Тиквеш водел со 0-1, но погрешната проценка на теренот останала некоригирана и по ВАР-проверката. Судискиот одбор на ФФМ утврди дека скопскиот тим бил оштетен во 37. минута од дуелот во 14. коло, кој заврши со гостински триумф од 0-3.
Спорниот момент настанал по центаршут одлево, кога гостинскиот фудбалер со број шест ја запрел топката со подигната десна рака. Одборот оценил дека раката била поставена неприродно и го проширувала телото, што е основа за казнен удар. Фатмир Бафто немал добра позиција за точна проценка и ја продолжил играта.
Клучниот пропуст потоа го направиле Влатко Илиоски и Борис Трајков во ВАР-собата. Тие не ги провериле сите снимки, меѓу кои и кадарот снимен зад голот, ниту го разгледале контактот со потребното забавување и поединечни кадри. Поради тоа, Бафто не бил повикан лично да ја прегледа ситуацијата и да ја промени одлуката.
Во истата анализа е потврдена исправноста на одлуката да нема пенал за Брегалница против Струга во 85. минута. Во тој случај гостинскиот играч прво ја шутнал топката со нога, а таа потоа му се одбила во раката, па Доне Ристевски и ВАР-тимот правилно постапиле.
За Вардар ова беше уште еден неповолен исход против Тиквеш сезонава. Кавадарчани славеа и со 3-1 на куп-гостувањето на 28 октомври, додека августовскиот првенствен дуел на нивен терен заврши 1-1. Пред последниот пораз, скопскиот состав победи кај Силекс со 1-0.
Следната првенствена обврска на Вардар е закажана за 28 ноември: гостување кај Арсими на Градскиот стадион во Гостивар, во рамките на 15. коло.