Наполи во Белгија ја најде замената за Лукаку

Италијанскиот шампион Наполи се поврзал со преставниците на напаѓачот на Генк, Толу Арокодаре, за можноста да го привлечат, јавува Фабрицио Романо.

Како што е познато, „партенопеите“ бараат засилување на оваа позиција по тешката повреда на Ромелу Лукаку, и веќе се зборуваше за нивниот интерес кон Расмус Хојлунд од Манчестер Јунајтед.

Според трансферниот експерт, цената на Арокодаре е 20-25 милиони евра, а неговиот договор со Генк е за уште две години. Во јануари 2023 година, неговиот тековен клуб вложи 5 милиони евра за да го добие од Амиен. Од тогаш, 24-годишниот играч има постигнато вкупно 41 гол и 12 асистенции во 112 натпревари за тимот.

Минатата сезона, репрезентативецот на Нигерија дури заврши како водечки стрелец во белгиското првенство со своите 17 гола во 30 натпревари, а во новата сезона има 1 гол во 4 настапи, во секој од кои влегуваше како замена. Порано ова лето, тој беше поврзуван со други два италијански клуба – Милан и Аталанта.