
УЕФА му го довери натпреварот Манчестер сити – Наполи на Иштван Ковач, романскиот арбитар со кого италијанскиот клуб има и непријатни европски спомени. Дуелот од Лигата на шампионите е закажан за вторник на „Етихад“, со почеток во 21 часот.
За Наполи, неговото име потсетува на првата четвртфинална пресметка со Милан во 2023 година. Наполитанците тогаш останаа незадоволни од судењето, па назначувањето на Ковач повторно го враќа во фокус тој натпревар.
Романецот од Кареи, пак, зад себе има три големи европски финалиња во четири години. Во Тирана ја делеше правдата при триумфот на Рома на Жозе Мурињо над Феенорд во Конференциската лига во сезоната 2021/22, а во Даблин во 2024 година го судеше финалето на Лига Европа, во кое Аталанта го победи Баер Леверкузен.
Следуваше и најголемата клупска европска сцена: финалето на Лигата на шампионите во Минхен во 2025 година, кога ПСЖ го совлада Интер со убедливи 5-0.
На „Етихад“ помошници на Ковач ќе бидат неговите сонародници Михаи Марица и Ференц Туњоги, додека Флорин Андреј е назначен за четврти судија. За ВАР ќе биде задолжен Полјакот Томаш Квјатковски, со помош на Холанѓанецот Денис Хиглер.
Наполи во меѓувреме има и сè поголеми кадровски грижи. Антонио Вергара го напушти теренот куцајќи на саботниот натпревар против Торино, што донесе нова неизвесност пред гостувањето во Манчестер.