Ферари покажа напредок во Остин, но не и доволно постојаност за да го претвори доброто темпо во победа. Тоа е оценката на Шарл Леклер по Големата награда на САД, каде што силната завршница не беше доволна за да го загрози победникот Кими Антонели.
За Монегашанецот, клучниот проблем се појавил уште пред трката. Во последниот квалификациски сегмент, Ферари тешко ги доведувал гумите до потребната температура. Брзината што ја имал на тренинзите исчезнала токму кога се решавал стартниот распоред, па Леклер морал да тргне од четвртата позиција.
Таквиот расплет беше особено разочарувачки по најбрзите времиња на првите два тренинга. Болидот СФ-26 повторно бил конкурентен во трката, а добрата стратегија и брзите кругови на тврдите гуми во последната делница го отворија прашањето дали подобра стартна позиција можела да донесе и поинаков исход.
„На сите три тренинга бевме многу силни. Но, во К3 беше исклучително тешко да ги загрееме гумите и веројатно таму ја загубивме шансата за победа. Кими денеска беше многу силен. Кога ќе го погледнеме целиот викенд, едноставно не сме доволно стабилни“, оцени Леклер.
Сепак, Леклер не смета дека само стартната позиција го одделила од триумф. Иако во финишот постојано барал информации од инженерот за темпото на Антонели, по трката признал дека неговите очекувања веројатно биле преголеми.
„Тврдите гуми беа навистина добри и можев силно да притискам. Постојано прашував какво темпо има Кими, но веројатно бев малку преоптимистичен. Сакав да се обидам, но загубив премногу време со Макс и Ландо. Дури и на чиста патека, не мислам дека ќе го стигнев. Денеска едноставно беше пребрз“, изјави тој.
За Ферари, викендот во Остин донесе охрабрување во поглед на брзината, но и јасно предупредување: добрите тренинзи и силното тркачко темпо не се доволни ако болидот не го задржи истото ниво и во решавачките моменти од квалификациите.
Учество во игри на среќа е дозволено за лица со 18+ години. Играј одговорно!