Крај на сагата: Јувентус конечно се договори со ПСЖ за напаѓачот

По преговори кои траеја неколку недели, Јувентус и Пари Сен Жермен конечно постигнаа согласност за враќањето на напаѓачот Рандал Коло Муани во торинскиот гигант.

Според Џанлука Ди Марцио, договорот е склучен како позајмица со задолжителна опција за купување на играчот ако “Старата госпоѓа” се квалификува за европските натпреварувања.

Вкупната сума на договорот изнесува 38 милиони евра и уште 12 милиони како бонуси. Самиот Коло Муани ќе добие петгодишен договор со плата од 5,5 милиони евра плус 1,5 милиони како бонуси.

За 27-годишниот Французин, ова ќе биде втор период во Јувентус. Во пролетта 2025 година тој играше како позајмен и се истакна со десет гола и три асистенции во 22 натпревари. Минатото лето, “бјанконерите” се обидоа да склучат нов договор со ПСЖ, но не дојде до согласност. Наместо тоа, париските клуб го испратија Коло Муани на позајмица во Тотенхем, каде што одигра 41 натпревар со пет постигнати гола и четири асистенции. За европскиот клубски шампион, играчот има вкупно 54 средби со 11 гола и седум асистенции.