Еден од селекторите со најдолг стаж си даде отказ по 15 години – ќе работи во трета лига!

Долгогодишниот селектор на фудбалската репрезентација на Луксембург, Лук Холц, поднесе оставка откако помина 15 години на оваа позиција, соопшти денеска Фудбалската федерација на Луксембург (ФФЛ).

“Холц побара од претседателот на ФФЛ да го раскине неговиот договор со веднаш. Тој има можност да прифати нов предизвик во својата тренерска кариера, приклучувајќи се на еден клуб во странство,” се наведува во соопштението.

Според медиумските извештаи, Холц би требало да го преземе Манхајм, клуб кој се натпреварува во третата германска лига.

Овој 56-годишен Луксембуржанец го водеше националниот тим на 144 натпревари, постигнувајќи 33 победи, со 29 реми исходи и 82 порази.